كُنْت فَاكْرَاهَا حَبِيبَه كلمات الشاعر أحمـد شاهين

كُنْت فَاكْرَاهَا حَبِيبَه
ــــــــــــــــــــــــــــــــــــــــ
كُل ذَنْبِي إنِّي بَرِيْئَه
وِإنْ أحْلاَمِي عَادِيَّه
وِإنِّي رَضْوَى أيْوَه رَاضْيَه
وِالسَّعَادَه مَا بِين عِنَيَّه
مِن شهُور بَقِيت أصَلِّي
بَدْعِي رَبِّي .. بَرْفَع إيدَيَّه
حِلْمِي زَي أي طِفْلَه
أبْقَى حَاجَه مُش عَادِيَّه
يُوم ميلاَدِي عَامْلَه حَفْلَه
أدْعِي فِيهَا أصْحَاب شوَيَّه
كُنْت فَرْحَانَه بِجَد
إنْ كُل الحُب لِيَّا
وِإنِّي حَبِيْبِة بَابَايَا
وِإنْ أُمِّي نُور عنَيَّه
وِإنْ اخْوَاتِي مَعَايَا
هُمَّا ضَهْرِي وِالهَدِيَّه
هُمَّا سَنَدِي فِي الحَيَاه
لَو فِي يُوم قِسْيِت عَلَيَّه
وَآدِي صَحْبَاتِي كَمَان
دُول حَبَايْبِي وِالعِيدِيَّه
كُنْت فَاكْرَه الدُّنْيَا حِلْوَه
هِيَّا حَدُّوتَه فِي غِنْوَه
وِإنْ كُل قلُوبْنَا خِير
وِإنْ عَايْشِنْهَا بضَمِير
كُنْت شَايْفَه فِيْكُو نَفْسِي
وِلَو زِعِلْت تقُولُوا اِنْسِي
كُنْت حَبَّاكُم بِجَد
وَاثْقَه فِيْكُو لأقْصَى حَد
كُنْت فَارْشَه الدُّنْيَا وَرْد
كُنْت مَادَّلْكُم إيدَيَّه
وِآه يَا دُنْيَا لَمَّا تِقْسِي
تَاخْدِي صُوتِي كَمَان وِحِسِّي
فِي لَحْظَه أبُص ألاَقِي نَفْسِي
مُش مَعَاكُو مِ الأسِيَّه
عَمَلْت إيه يَا دُنْيَا فِيكِي
وِإيه جَنِيتُه مُش رَاضِيكِي
وِإيه مَعَايَا خَدتُه مِنِّك
قَاسْيَه اِنْتِي وِطَبْع فِيكِي
أقرَب مَالِيَّا اتْخَلُّوا عَنِّي
بَرْضُو يِرْضِيك دَه يَا عَمِّي
يُوم ميلاَدِي كُنْت بَجْرِي
كُنْت بَلْعَب آه وِبَجْرِي
فَجْأه تِنْدَهْلِي القَرِيْبَه
كُنْت فَاكْرَاهَا حَبِيْبَه
هِيَّا دِي يَا عَمَّه العِيدِيَّه
كَان نِّفْسِي أحَقق حِلْم بَابَا
وَاسْعِد كَمَان قَلْبِك يَا مَامَا
مَاكُنْتِش اعْرَف إنَّهَا غَابَه
وِإنِّي لُقْمَه لِلدِّيَابَه
وِهَعْمِل إيه وَأنَا قَلْبِي أبْيَض
وِإمْتَى نَارَك يَابَا تِبْرَد
وِاخْوَاتِي يِنْسُوا إزَّاي
فِي دَمِّي كُنْت بَغْرَق
هِيَّا دِي يَا عَمَّه العِيدِيَّه
ـــــــــــــــــــــــــــــــــــــــــــ
كلمات الشاعر أحمـد شاهين
 ----- مصر - أسيوط -----